Бугун Алтынньы 16 күнүгэр Үөһээ Бүлүүтээҕи “Тускул” оҕо киинин иһинэн үлэлиир «Сомоҕо» оҕо хамсааһынын кеҕүлээһининэн Саха сирин Ийэлэрин күннэрин көрсө “Ис сүрэхтэн...” диэн истиҥ көрсүһүүнү Zoom платформа нөҥүө тэрийдилэр. Бу улахан тэрээһиҥҥэ икки улуус Үөһээ Бүлүү уонна Нам улууһуттан Үөдэй нэһилиэгиттэн кыттыыны ыллылар. Ол курдук Россия оҕолорун түмэр хамсааһыҥҥа кыттыһан «Классные встречи» бырайыак чэрчитинэн «Россия дьоруой ийэлэрин” аат хаһаайката, Саха сиригэр Герой ийэлэргэ анаан ыытыллыбыт акция кыттыылааҕа, Мэйик нэһилиэгин бочуоттаах олохтооҕо, үлэ бэтэрээнэ, “Ситим” эбээлэр түмсүүлэрин актыыбынай кыттыылааҕа - Иванова Марфа Ивановна ыалдьыттаата. Уонна Марфа Ивановна уола Иннокентий Михайлович, Ньургуйаана Алексеевна дьиэ кэргэнинээн Үөдэй нэһилиэгиттэн бүгүҥҥү көрсүһүүгэ төһө да ыраах олордоллор ийэлэрин эҕэрдэлии киирдилэр. Кинилэр 2017 сыллаахха республиканскай “Тыа сирэ” ыал күрэх кыайыылаахтара, Саха сирин аатыттан Москва куоракка “Семья года” Бүтүн Россиятааҕы күрэххэ кыттан “Сельская семья” номинация кыайыылаахтара буолбуттарынан биһиги кинилэри истэн киэҥ туттуохпутун тутуннубут. Бу тэрээһиҥҥэ Үөһээ Бүлүү улууһун дьиэ кэргэн отделын специалиһа Романова Сардана Ивановна киирэн эҕэрдэлээтэ уонна сэмэй бэлэхтэрин Марфа Ивановнаҕа туттарда. Салгыы Нам улууһун З.П.Саввин аатын сүгэр Үөдэй орто оскуолатын актыбыыс оҕолоро уонна салайааччылара Матвеева Валентина Афанасьевналыын киирэннэр Ивановтар дьиэ кэргэттэрин туһунан сиһилии билиһиннэрдилэр, истиҥ эҕэрдэлэрин тиэртилэр. Мэйик орто оскуолатын директора Попова Валентина Васильевна дьоруой ийэҕэ Марфа Ивановнаҕа баҕа санаатын уонна сэмэй бэлэхтэрин, тыыннаах сибэкки дьөрбөтүн туттардылар. Дьэ, бу курдук төһө да дьиэҕэ хааттаран олордорбут маннык истиҥ- иһирэх тэрээһиннэри ыытыахха сөп эбит диэн тэрийээччилэр санаабыт бөҕөргөөтө. Барыта 87 оҕо, салайааччы, төрөппүттэр кыттыыны ыллылар. Саамай кылаабынайа ыҥырбыт дьоруойдарбыт астынан, махтанан тарҕастылар, эппит үтүө тыллара инникигэ кынаттаата. Онтон кэнчээри ыччакка маннык киһи киэн туттар дьиэ кэргэттэрэ, дьоруой Ийэлэрэ баалларын сырдаппыппытыттан, киэҥ эйгэҕэ таһаарбыппытыттан киэн тутуннубут